CEBU, Philippines – Patay ang usa ka konsehal sa barangay human kini gitabangan og kulata dayon gipusil sa tulo ka mga lalaki diha sa Barangay Alegria, Tuburan.
Ang biktima naila nga si Ricardo Aquilla, 50, konsehal sa barangay Cogon sa maong lungsod. Samtang gitudlo nga suspek mao sila si Ranel Lumapas Bantay, 36, Darryl Labandero, 19, ug Justino Alfeche ,49, pulos taga Barangay Gimama, Tuburan.
Sumala pa ni Senior Inspector William Homoc ang hepe sa Tuburan Police pulos bisita sa usa ka birthday party ang biktima ug ang mga suspek apan nagkabikil.
Tungod sa kagubot, miuna og lakaw ang konsehal apan giatangan na diay kini sa mga suspek nga mas miuna na diay og biya luwan og motorsiklo. Matud pa gitabangan og bukbok si Aquilla ug gibunal-bunalan. Wala magamit sa konsehal ang iyang dalang armas kay nailog kini gikan kaniya ug maoy gigamit pagpusil kaniya. Ang mga suspek mitahan sa usa ka konsehal ‘sab sa maong barangay ug gi-turnover sa kapulisan. Nakuha sa kapulisan ang .45 caliber pistol sa biktima ingon man ang upat ka basiyo sa bala sa maong armas diha sa crime scene. -/EIM) (BANAT NEWS)