CEBU, Philippines – Mokabat sa P1.54 milyones nga kantidad sa mga alahas ug salapi ang nasakiyo sa wala pa hiilhing mga kawatan nga milungkab sa usa ka tindahan sa dalan A. del Rosario, Barangay Mantuyong, Dakbayan sa Mandaue.
Nadiskubrehan kini niadtong Lunes na sa buntag sa mga kawani sa U-Well Marketing atol sa pagpangabli sa mga trabahante sa tindahan.
Si Senior Inspector Jimmy Portes, hepe sa Investigation Detection and Management Bureau (IDMB) uban sa mga sakop sa Theft and Robbery Section sa Mandaue City Police Office (MCPO) ug mga sakop sa Scene on Crime Operation (SOCO) maoy naghimo og pakisusi sa maong pagpanglungkab.
Ang supervisor sa maong tindahan nga si Rodulfo Casinillo uban sa mga kawani sa maong tindahan maoy nakabantay nga nagkatag na ang mga butang sa sulod sa ilang tindahan.
Base sa pagsusi sa mga polis, ang kawatan diha miagi sa luyo ug mikatkat sa atop ug gilungkab ang sin niini ug diha miagi pagsulod.
Giguba sa mga kawatan ang opisina sa maong tindahan nga diin mahimutang ang steel box nga gisudlan sa kwarta ug mga alahas.
Ang tag-iya sa maong tindahan mao si Yu Sang, 54 nga taga Xiamen, China kinsa giingong dunay kwarto tupad sa gilungkab nga opisina.
Nasayran usab sa kapolisan nga adlawan lamang nga dunay mo- duty nga guwardiya sa maong tindahan. -/EIM) (BANAT NEWS)