CEBU, Philippines – Duha ka magsuong babaye, usa kanila sakop sa senior citizen ang nadakpan sa Carbon Police Station human nga nakuhaan og daghang mga drugas, sa Sitio Ermita Proper, Barangay Ermita, Cebu City, niadtong Lunes sa gabii.
Ang duha naila nga sila si Ornecita Cabugason, 60, ug Ester Flores Cabando, 54, pulos nagpuyo sa maong lugar nga gihulagway sa kapulisan nga mga level 3 drug pusher.
Ang kapolisan armado og duha ka search warrants batok sa duha nga giisyu ni Judge Wilfredo Navarro ug Judge Gilbert Moises.
Aron pagpalig-on sa kaso, dungan nga gipalitan sa mga poseur buyers ang duha nga managlahi og mga balay ug nagdistansiya lang og pipila ka metros sa maong dapit.
Matud pa ni Senior Inspector Noel Lomente, hepe sa Carbon Police Station nahawiran na unta si Cabando human mitunol og usa ka paketeng shabu diha sa bintana apan nakalighot kini ug nakadagan sa kasilyas.
Matud pa gi-flush niini ang mga gituohang drugas ug naapil hasta pa ang cellphone niini, dali dayon kining milusot sa secret door ilawom sa iyang bangerahan paggawas.
Apan nabantayan na kining daan sa mga polis hinungdan sa pagkasikop kaniya paglugwa niya sa secret door.
Nakuha sa sulod sa balay ni Cabando ang tulo ka dagko, 14 ka medium, lima ka gagmay nga pakete nga pulos dunay sud nga drugas nga nagkantidad og 45 mil .
Duna say usa ka balde nga sinsilyo ang nakuha sa kapulisan, lakip pa sa 47 mil pesos nga gitohoang halin sa ilegal nga drugas niini.
Samtang ang magulang niini nga si Cabugason, nakuhaan ‘sab og tulo ka dagku, lima ka medium, upat ka gagmay nga pulos dunay sud nga gituohang shabu nga nagkantidad tanan og P41 mil ug cash money nga P470.00. -/EIM) (BANAT NEWS)