CEBU, Philippines – Grabeng naangol ang usa ka lalaki human nga gipusil diha sa Barangay Pajac, Dakbayan sa Lapu-Lapu sa miaging gabii. Selos maoy usa sa gisubay nga motibo.
Si Police Officer Two Joseph Cutanda sa Homicide Section sa Lapu-Lapu Police Office (LLCPO) miila sa biktima nga mao si Jeffrey Pregoner, 34, nagpuyo sa maong dapit.
Usa ka wa mailhing lalaki nga dunay kaubang laing usa gihapon ka wala mailhing lalaki ang gitumbok nga migukod ug mipusil sa biktima, apan daling nangikyas human sa hitabo.
Matud pa ni Cutanda nipalit og sigarilyo sa tindahan si Pregoner nianang tungora dihang giduol kini sa usa ka lalaki ug kalit nga gipusil sa tiyan, daling midagan ang biktima apan gigukod kini ug giusban pagpusil hangtud nga kini nakaabot sa ilang balay ug nakatago.
Ang gunman daling miikyas kauban sa lookout niini samtang ang biktima gidala sa tambalanan.
Base sa gihimong imbestigasyon, nagduda ang kabanay sa biktima nga ang kanhi uyab sa karelasyon karon niini ang responsable sa hitabo tungod kay nakagawas na kini sa prisohan dili pa lang dugay. -/EIM) (BANAT NEWS)