CEBU, Philippines - Gitulis sa duha ka armadong lalaking nagsakay og motor ang duha ka ahente sa kompanya sa sigarilyo samtang kini nag-deliver og kinahon nga sigarilyo sa usa ka tindahan sa Sitio Kabangkalan, Barangay Gairan sa dakbayan sa Bogo pasado alas 2:00 sa miaging hapon.
Ang mga biktima naila nga sila si Gary Bigno, 32, taga Barangay Tisa ug si Reybombom Guinto, 29, taga Barrio Luz, pulos sa Cebu City.
Base sa imbestigasyon sa kapolisan nga gipangulohan ni Senior Inspector Ildefonso Miranda, deputy chief, duha ka mga lalaki nga nagsakay og motor ang kalit nga miabot ug mideklarar og hold up.
Matud pa armado ang duha ug gitagsahan sila’g tion og kalibre .45 nga pistola ug revolver ug mimando nga ihatag ang ilang halin. Tungod sa kahadlok sa duha wala na sila misuway og sukol hinungdan nga gidala ang ilang kapin sa P25 mil nga halin.
Apan human niini, gimandoan sila sa duha pagsulod sa van ug gipabarog ug wala palihoka. Human niini mipasirit ang duha luwan sa motor ug dali ‘sab nga gitabangan sa mga tawo ang duha ug mitawag sa mga polis.
Pipila ka bulan na ang milabay, may susamang nahitabo sa Liloan diin ang ahente nga gitulis gipasulod sa van human makuha ilang kwarta. Padayon pa ang imbestigasyon sa kapolisan sa pag-ila sa mga responsable. (BANAT NEWS)