CEBU, Philippines - Laing opisyal sa kapolisan ang ipaubos sa imbestigasyon nunot sa pasangil nga nangayo og kwarta aron mapadali ang pagpabalhin sa usa ka polis.
Ang Regional Investigation Detection and Management Division (RIDMB) nga gipangulohan ni Senior Superintendent Rey Lyndon Lawas ang mohimo sa imbestigasyon sa tulo nga may ranggo nga Senior Superintendent, Superintendent ug usa ka Senior Police Officer (SPO1).
Matud ni Lawas nga una’ng nigawas ang report gikan sa mga tabi-tabi nga duna’y mihangyo nga magpabalhin ug gipangayoan og kwarta.
Gikatahong moabot sa P5,000 ang gipangayo diin matud pa ang maong polis gusto unta magpabalhin sa Bohol.
Sumala pa nga usa ka opisyal sa kapolisan ang giingong miduol sa polis nga midawat sa maong kwarta ug giingnan si “SPO1” nga ipauli ang kwarta apan giuli nga kuwang na.
Ang usa ka opisyal nga may ranggo nga Senior Superintendent ang mahimong maapil sa maong kaso kung masayran nga nahibalo kini apan wala’y gibuhat.
Plano karon ni Lawas nga makakuha og affidavit gikan sa biktima ug pagsubay kung may lain pa ba nga nabiktima.
Gipasabot ni Lawas nga ang mapamatud-ang guilty sa maong kaso hayan kini matangtang sa serbisyo.
Gidugang ni Lawas nga wala gyud sila’y mahimo kun dili ang pag-imbestigar sa maong kaso gumikan kay tipik ug kabahin kini sa ilang gimbuhaton sa RIDMB. (BANAT NEWS)