CEBU, Philippines – Nagtingkagol sa prisohan ang duha ka lalaki human naaktohan nga nagduwa og hantak samtang usa niini nakuhaan og ilegal nga druga sa sitio Baybay, barangay Luray Dos, dakbayan sa Toledo.
Giila ang mga dinakpan nga sila si Antonio Madrid, 71-anyos ug Randy Batomalaque, 24-anyos, pulos nagpuyo sa nahisgutang lugar.
Sa gipahigayun nga paglibot nila ni Police Insp. Jovito Labra kauban nila ni SPO1 Jeffrey Matunog ug PO2 Geoffrey Niez, naatlan nila ang duha nga nagduwa og hantak.
Gisikop sa kapolisan ang duha ug nakuha usab ang mga tag 25 sentimo nga antugon ug kwarta nga gituohang pusta sa sugal.
Dihang girekisa ang duha, nakuhaan si Madrid og upat ka gagmay’ng pakete nga gituohang shabu nga gisulod sa iyang bulsa.
Gibalhug na ang duha ka suspek ug gikatakdang pasakaan og tukmang kaso. -/GMR) (BANAT NEWS)