CEBU, Philippines – Gidakop sa kapolisan ang usa ka babaye nga namaligya og CD nga nagpakita og law-ay nga mga salida sa sitio Capulay, Tayud, lungsod sa Liloan alas 5 pasado niadtong Sabado sa hapon.
Ang gidakop mao si Sobelen Dominguez Ocor, 25-anyos, minyo nga lumad nga taga Baybay, Leyte ug kasamtangang namaligya og mga CD ug DVD sa nahisgutang dapit.
Si SPO1 Bryan Batiquen sa Liloan Police Station miingon nga nakadawat og mga taho ang ilang buhatan gikan sa nagpakabanang molupyo labot sa pagpamaligya sa dinakpan og CD sa mga law-ay’ng salida.
Si Senior Insp. Ramil Morpos nga maoy ilang hepe ang nangulo sa paghimo og pakisusi ug nasuta nga positibo dihang naabtan nga gitapok-an sa mga lalaki nga customer.
Dihang ilang gidakop ang babaye, maoy ilang nasakmit ang nahibilin nga pito ka mga CD nga nagpakita og law-ay nga salida ug daku ang ilang pagtuo nga daghan na ang nahalin niini.
Ang dinakpan kasamtangang gitanggong sulod sa ilang detention cell ug tukmang kaso ang ilang ipasaka karong adlawa. - /GMR) (BANAT NEWS)