CEBU, Philippines - Nangayo og dugang polis ug traffic enforcers ang kagamhanan sa lalawigan sa Sugbo nga mobantay sa Capitol compound nga gihimong access road sa mga pribado ug pangpublikong sakyanan.
Kasamtangang gisirado ang dalan M. Llorente, kilid nga bahin sa Kapitolyo gumikan sa nagpadayong road widening lahos sa M. Velez nga gihimo sa Department of Public Works and Highways (DPWH).
Nasayran nga hugot nga gidili ang pagsakay sa mga pasahero alang sa mga pribado ug pangpublikong sakyan nga moagi sulod sa Capitol compound.
Hinungdan nga ang Kapitolyo mihangyo sa Cebu City Traffic Operation Management og dugang traffic enforcers sa lugar aron maoy makagiya sa dagan sa trapiko.
Lakip sa gihangyo ang kapolisan nga magbantay sa seguridad sa lugar lakip na ang mga blue guards sa Kapitolyo aron luwas gikan sa mga badlungon sa katilingban. (BANAT NEWS)