CEBU, Philippines - Gibutyag sa direktor sa Cebu Provincial Police Office (CPPO), Senior Supt. Noel Gillamac, nga duna na sila’y suspek sa nahitabong lungkab sa tulo ka munisipyo sa amihanang bahin sa lalawigan sa Sugbo.
Hinuon matud ni Gillamac nga ila pa hashasan og maayo aron gyud masayran kon kinsa ang responsable sa krimen.
Si Gillamac mibutyag nga nahinabi na niya si Gob. Hilario Davide III labot sa hitabo ug nakadawat sila og kamanduan sa paghimo og imbestigasyon ug pagpakig-alayon sa pagpasaka og kaso.
Usa sa ilang imbestigahan ang taho nga dugay nakaresponde ang kapolisan sa Compostela, Carmen ug Sogod bisan sa kaduol ra sa estasyon sa mga munisipyo.
Gipasabot ni Gillamac nga dili lang responsibilidad sa kapolisan ang paghatag og seguridad sa munisipyo apan lakip usab sa mga opisyal sama sa mga treasurers aron ibutang sa luwas nga lugar ang kuwarta sa gobiyerno.
Aron malikayan nga masubli pa ang maong hitabo, gimanduan ni Gillamac ang iyang mga chiefs of police nga makig-alayon sa ilang mga mayor aron mopahigayon og security survey sa mga buhatan sa kagamhanan aron dunay rekomendasyon kon unsa ang mga lakang nga himoon. (BANAT NEWS)