CEBU, Philippines - Nasikop sa security guard ang babaye ug lalaki nga nangigo sulod sa usa ka inilang restaurant human manguha og gamay’ng bag sa kustomer sa miaging gabii sa barangay Apas, dakbayan sa Sugbo. Ang nasikop naila nga sila si Adzhar Liwalog, 32, lumad nga taga Jolo, Sulu ug si Gema Bayuta nga parehong nagpuyo sa San Roque, dakbayan sa Talisay.
Ang biktima naila nga si Milrene Jasanero, 23, nga taga Barrio Luz, dakbayan sa Sugbo.
Base sa imbestigasyon nga gihimo sa Theft and Robbery Section sa kapolisan nga pasado alas 6:00 sa gabii niadtong Biyernes samtang nagkaon ang biktima, ang duha ka suspetsado nangita og tiyempo nga makuha nila ang pouch sa biktima.
Dihang nalipat na ang biktima, nakahigayon ang duha sa pagkuha niini.
Ang maong pouch may sulod nga MetroBank Card, nagkadaiyang identification cards ug salapi nga mokabat sa P400.
Apan wala’y suwerte ang duha ka suspek tungod kay nakabantay ang guwardiya nga si Rene Degulacion kinsa daling misikop sa duha.
Nabawi hinuon ang pouch samtang ang duha ka suspek gitugyan ngadto sa TRS.
Kasamtangang gitanggong ang mga suspek sa Cebu City Police Office samtang naghulat pa ang kapolisan kon mopasaka ba og kaso ang biktima. (BANAT NEWS)