CEBU, Philippines - Nipasundayag sa nasud sa Indonesia ang sikat na kaayong Lumad Basakanon dancers human nidaug sa Aliwan Festival niadtong Mayo.
Matud sa kapitan sa barangay Basak-San Nicolas, George Rama nga ang Lumad Basakanon ang nirepresentar sa Pilipinas sa Asia Pacific Festival sa Indonesia.
Sumala pa ni Rama nga dili na siya mahibulong nga daghan ang motawag sa grupo aron mo-guest tungod ilado na gyud sila sa ilang pasundayag. “Sila ang gikuha sa kadaghang contingents sa Philippines, ang Sinulog contingent nga Lumad Basakanon gyud ilang gipili nga moadto,” matud niya.
Ika-limang biyahe na sa grupo sukad midaug sa Aliwan Festival human sila mipasundayag sa Carmen, dakbayan sa Toledo sa Sugbo ug sa mga syudad sa Cabanatuan ug sa Tacloban.
Matud ni Rama nga may nadawat usab sila’ng imbitasyon sa Singapore karong Nobiyembre.
“Nahadlok na nuon ko nga basi’g dili na nuon mi kaapil sa Sinulog, basin og i-guest na lang mi, pero okey ra pud namo nga ihalad sa Sto. Niño, basta palargahon ra pud mi next year sa Aliwan para maka-defend sa among title,” matud ni Rama. Karong tuiga midaug sa Sinulog Festival ang grupo samtang nagpasalamat si Rama sa Sinulog Foundation sa pagsuporta sa mga biyahe. (/GMR)(BANAT NEWS)