CEBU, Philippines- Gisusi sa mga opisyal sa barangay Apas ug Cebu City Mining Board ang sitio Rotunda human makadawat og reklamo sa mga residente tungod sa giingong mina sa lugar.
Ang gireklamo sa mga residente mao ang pamilya ni Kimberly Densing tungod kay nabalaka sila sa ilang seguridad ilabi na nga lawom na ang kawot ug kuyaw nga mahugno.
Una’ng nasuta sa mga residente nga alang sa groto sa Birhen ang pagkawot sa pamilyang Densing sa likod nga bahin sa ilang panimalay apan daku na lang ang ilang kahikurat nga miabot na sa pikas habig duol sa ilang silingan.
Si Kapitan Ramil Ayuman mibutyag nga ilang giaksyonan ang reklamo pinaagi sa pagsusi ug nasuta nga taas na ang nahimong pagkawot tungod kay unom ka buwan na kining gihimo.
Gituohan nga dunay treasure hunting nga gihimo sa lugar.
Ang operations chief sa CCMB, Rodrigo Berdin, mibutyag nga base sa ilang pagsusi sa dapit nasuta nga wala’y mga dokumento nga naghatag og pagtugot sa pamilya aron magmina.
Gidugang ni Berdin nga ila na nga gipahunong ug kon magmagahi ang hingtungdan, mapugos sila sa pagpatuman sa balaud. Nahinabi sa Banat News si Densing ug iyang gihimakak ang tanang alegasyon nga matud pa nag-treasure hunting ug nagmina sila sa ilang dapit.
Gitataw ni Densing nga ang rason sa pagkubkob nila og yuta aron paghabwa sa mga kalag gumikan kay gipadamgo ang iyang amahan. - /GMR) (BANAT NEWS)