CEBU, Philippines- Ang tanang 16 opisyal sa Barangay Councilors League of the Philippines-Cebu Chapter miduso og manifesto sa ilang pagsuporta sa pagbaligya sa 45.2 ektarya nga luna sa South Road Properties.
Gawas sa 16 barangay opisyal, gibana-bana usab nga duna’y 80 porsiyento o 448 ka mga konsehal sa barangay ang planong mopirma sa manifesto gawas sa kinatibuk-ang 560 konsehal gikan sa 80 barangays sa siyudad sumala sa pangulo sa BCLP Raymond Garcia.
Kauban ang mga opisyal sa BCLP nga sila executive vice-president Litoy Ceniza, south district vice president, Eugen Tabas, north district vice president, Eliodoro "Yody" Sanchez, Grace Baquero (secretary-general), Maria Pino (treasurer), David Agravante (auditor) ug Gerry Auxillo, Jr. (public relations officer).
Lakip usab sila sa north district board of directors Troy Tan, Bradex Flores, Frank Gajudo ug Lino Bontilao ug south district board members Boy Ababon, Jojo Peralta, Anne Vestil Palomo, ug Richard Buscaino.
Sumala sa resolusyon sa BCLP, dako ang matabang sa halin sa luna sa SRP sa mga proyekto sa siyudad nga ang makabenepisyo mao ang mga konstituwente niini.
Magamit usab kini pagbayad sa P2.9 bilyones nga balanse sa syudad ngadto sa Japan Bank for International Cooperation nga maoy nag-develop sa 300-ektarya nga luna sa SRP. - /EIM) (BANAT NEWS)