CEBU, Philippines- Nadakpan sa kapolisan ang kanhi nila kauban nga nadestino sa Consolacion Police Station nga giingong nalambigit sa pagpamaligya og gidiling drugas ug pagpangawat human kini mataktak sa serbisyo.
Ang gidakop sa mga sakop sa Provincial Intelligence Branch (PIB) kagahapon sa buntag mao si Antonio Aguisanda, 47-anyos ug lumad nga taga Bantayan Island ug nagranggo niadto og PO3 sa aktibo pa kini sa serbisyo.
Didto madakpi si Aguisanda sa Purok 3, Sitio Sampaguita, Barangay Lamac, Consolacion diha nga ang mga PIB agents mironda sa iyang gipuy-an base sa search warrant nga giisyu ni Regional Trial Court (RTC) Branch 56 Judge Teresita Galanida sa Mandaue City.
Base sa report nga si Aguisanda nataktak sa serbisyo gumikan sa kaso’ng extortion o pagpangilkil. Sumala pa nga nakalitan ug nasurpresa si Aguisanda sa kalit nga pag-abot sa mga polis.
Gikataho nga misuway pa gani unta kini sa pagsukol apan nakontrolar siya sa mga operatiba sa PIB. Nakuha gikan kang Aguisanda ang usa ka kalibre 45 nga pistola ug 28 ka bala, upat ka magazine, mga himan sa paghingos og shabu ug mga drugas nga gibana-bana nga kantidad og P320 mil.
May kuwarta usab nga P9 mil nga nakuha ang mga polis. Gitan-aw karon sa kapolisan ang posible nga kalambigitan ni Aguisanda sa pagtulis sa Rose Pharmacy Branch sa Consolacion kaniadto’ng Lunes.
Ang ngalan ni Aguisanda nalakip sa “top list” sa mga dakponon sa PIB tungod sa kalambigitan sa lainlaing salaod. Si Chief Inspector Armando Labora, ang team leader sa mga polis nga midakop ni Aguisanda, mitug-an nga ang dinakpan usa sa mga suspek sa pagpanulis sa botika sa Consolacion.
“Notado g’yud ni si Aguisanda kay identified siya sa mga tulis sa lugar gawas nga drug personality ni siya,” matud pa ni Labora.
Apan si Aguisanda mihimakak sa maong pasangil nga nalambigit siya sa pagpanulis, apan miangkon kini sa mga carnapping nga nahitabo sa Consolacion nga usa siya sa mga mihimo nga biktima ang usa ka konsehal sa Ibabao, Mandaue City.
Giawhag karon sa PIB ang mga nahimo’ng biktima ni Aguisanda nga makig-alayon sa ilang buhatan, aron pormal nga mapasaka ang kaso batok sa dinakpan.
Samtang ang hepe sa Liloan Police Station nga si Sr. Inspector Ramil Morpoz nagkanayon nga si Aguisanda ‘sab ang suspek sa mga nahitabo nga pagpangawat og sakyanan sa iyang lungsod. Dugang ni Morpos nga ila na nga naaresto ang usa sa mga kauban ni Aguisanda ning bag-ohay pa lang human nga ilang nasigpatan sa lungsod sa Liloan nga gikan nakakuha og sakyanan sa Consolacion. - /RUB) (BANAT NEWS)