CEBU, Philippines - Usa ka brand new nga Sokol combat utility helicopter sa Philippine Air Force nga maoy escort sa laing susamang chopper nga gisakyan sa upat ka miyembro sa kabinete ni Presidente Benigno Aquino III nahagsa pipila ka metros sa dayon pa niining paglupad gikan sa Camp Ranao sa Marawi City kagahapon.
Hinuon way nakalas sa maong aksidente gawas lang sa naangol nga usa ka crew ug usa ka 17-anyos nga batan-ong nagpuyo sa usa ka payag duol sa gihagsaan sa maong abyon sumala pa sa report sa GMA News.tv.
Ang maong nahagsa Sokol helicopter nga napalit niadto lang tuig 2012 gikan sa Swidnik sa Poland, gisakyan nila ni 4th Infantry Division Philippine Army Major General Ricardo Visaya, Col. Alexander Macario ug uban pang wa hinganling mga sundalo.
Mibalik dayon ang laing Sokol helicopter nga gisakyan nila ni Interior Secretary Mar Roxas, Defense Secretary Voltaire Gazmin, Energy Secretary Jericho Petilla aron pagsusi sa crash site ug pagkahuman mipadayon paglupad sa Cagayan de Oro City. Tungod sa hitabo, grounded ang tanang Sokol helicopters alang sa imbestigasyon. (BANAT NEWS)