CEBU, Philippines - Unom ka mga component cities ug lima ka lungsod ang giisip nga areas of concern tungod sa problema sa illegal drugs sumala pa sa Provincial Intelligence Branch.
Kini naglangkob sa Talisay, Naga, Carcar, Toledo, Bogo, ug Danao. Lakip usab ang lungsod sa Minglanilla, San Fernando, Consolacion, Liloan ug Compostela nga matud pa nakapasar sa parameters sa PIB isip areas of concern.
Si Superintendent Rodulfo Albotra Jr., PIB chief, mitug-an nga kining maong mga lugar adunay taas nga populasyon, progresibo, nindot nga lokasyon sa transshipment sa illegal drugs, ug ang gidaghanon sa drug pushers nga anaa sa target list sa PIB. Gani niadtong Biyernes sa gabii nasikop sa PIB si Melquiades Amistad ug ang giingong runner niini nga si Darios Canaya, pulos taga Barangay Liburon, Carcar City.
Nakuhaan sila og tulo ka gagmay ug lima ka dagkong bulto sa gidudahang shabu nga mokabat sa P312,700.
Matud ni Senior Inspector Leo Logroño, sa PIB, nga si Amistad usa ka level three drug pusher kinsa maka-dispose og di mominos sa 200 gramos sa shabu matag semana.
Sa iyang bahin, si Amistad miangkon nga aduna siya’y shabu sa iyang posisyon. Gani, ikaduha na kini nasikop tungod sa samang salaud. Nasikop siya kaniadtong 2006 apan nakagawas ra usab human ma-dismiss ang maong kaso. (BANAT NEWS)