CEBU, Philippines - Gidunggab sa cellphone technician ang iyang kustomer sa barangay Mantuyong, dakbayan sa Mandaue alas 10 pasado sa niaging gabii.
Ang biktima mao si Leonardo Arellano, 38-anyos, taga Poblacion Oriental, lungsod sa Consolacion samtang ang nagdunggab nailhan lang sa angga nga Carding ug cellphone techinician sa maong lugar.
Si PO1 Mar Villamante sa Presinto 1 sa Mandaue City Police Office (MCPO) miingon nga nagpaayo ang biktima sa iyang cellphone niadto pang Biyernes sa hapon. Matud pa nga gipasaligan sa suspetsado nga iyang ayuhon ang cellphone apan dili pa niya makuha niadtong adlawa hinungdan nga gihangyo kini nga balikon sa sunod adlaw.
Gibalik sa biktima niadtong Biyernes sa buntag apan wala pa mahuman sa pag-ayo ang cellphone ug giingnan nga ipabalik nianang pagka-gabii.
Dihang gibalik sa biktima ang iyang cellphone nianang pagka-gabii wala pa gihapon maayo ug nahitabo ang mainitong panaglalis.
Gikuha sa suspetsado ang iyang kutsilyo ug gidunggab ang biktima sa makadaghang higayun.
Nagkabuang ang biktima sa pagpanagang hinungdan sa naangkon niining mga samad sa iyang bukton.
Ang mga polis sa Presinto 1 nga nakadawat sa maong alarma daling miresponde ug ang suspetsado nga nakamatikod daling misibat pahilayo sa maong dapit. Daling gidala sa mga polis ang biktima sa Mandaue City Hospital apan gibalhin sa Vicente Sotto Memorial Medical Center sa dakbayan sa Sugbo. (BANAT NEWS)