CEBU, Philippines - Kapin sa 500 ka estudyante, alumni ug faculty sa Talisay City College ang migama og manifesto sa ilang awhag nga si Mayor Johnny De los Reyes ang ibutang nga officer-in-charge (OIC) sa eskwelahan.
Gawas niini giawhag usab nila ang daling re-composition sa Board of Trustees (BOT) sa TCC.
Niining ulahi si Dr. Gamaliel Vicente kinsa maoy acting city engineer sa Talisay ang gitudlo sa BOT nga molingkod isip OIC sa TCC apan daghan ang misupak niini tungod kay magdugang lang kini sa trabaho ni Vicente kinsa dean usab sa University of the Visayas College of Engineering and Architecture.
Matud sa mga mireklamo nga buot nilang si De los Reyes lang una ang molingkod nga OIC sa TCC samtang nangita og molingkod nga presidente sa TCC. Subay niini, si De los Reyes nga nahinabi sa mga tigbalita kagahapon nagkanayon nga girespeto niya ang manifesto apan dili siya pweding molingkod isip OIC sa TCC tungod sa kadaghan niyang trabaho isip mayor sa siyudad.
Matud sa mayor nga gusto niyang hatagan og kahigayonan si Vicente nga maprobar niini nga angayan siya sa bag-ong posisyon nga gisangon kaniya.
Si Vicente sa iyang bahin, nagkanayon nga dili na siya pweding motalikod sa bag-ong obligasyon ug misaad nga magpabilin siyang neutral. - /EIM) (BANAT NEWS)