CEBU, Philippines- Pwerting demalasa sa usa ka lalaki human nga kini nabiktima sa hit and run apan gipaslak pa g’yud kini sa prisohan human nakuhaan og pito ka paketeng gituohang shabu sa iyang bulsa sa mga nag- atiman nga doktor sulod sa Cebu City Medical Center (CCMC) sa nakalabay nga kaadlawon.
Ang biktima sa hit and run ug nakuhaan og drugas giila nga si Lester Villaber, 32, taga Barangay Ibo, Lapu-Lapu City.
Matud pa ni PO2 Mario Nator sa Carbon Police Station nga nahinabi sa Banat News nga usa ka wala mailhing sakyanan ang nakabangga ni Villaber sa Barangay Mabolo pasado alas-2 sa kaadlawon.
Ang mga residente sa maong lugar ang daling mitabang sa biktima ug gidala sa CCMC. Apan ang mga nurse nga miatiman kaniya nakurat dihang ilang nakita ang drugas sa bulsa niini.
Sumala pa ni PO2 Nator mga pangos lang ang naangkon ni Villaber ug human nadapatan og tambal gi-turnover kini ngadto na sa Carbon Police Station.
Samtang sa dakbayan sa Lapu-Lapu, unom ka tawo ang nangasikop sa managlahing mga operasyon sa kapolisan nga miresulta sa pagkasakmit og mga shabu ug mga armas.
Ang nadakpan mao si Marcos Toring, alyas Mark, 44, nga taga Sangi, Barangay Pajo human sa buy-bust operation nila ni Senior Inspector Wilbert Parilla ug nasakmitan kini og 15 ka gagmay nga paketeng shabu ug drug paraphernalia.
Samtang nadakpan usab sa police checkpoint ni Inspector Rex Ybañez sa Barangay Babag sila si Antonio Deguelio, 23, ug Alberto Badayos, 24, pulos taga Cabul-an, Bohol nga nasakmitan usab og 16 ka paketeng shabu, usa ka KG9 submachine gun, usa ka kalibre .45 ug 9mm pistol nga puno sa bala ang mga magazine.
Dugang nadakpan mao sila si Ranie Mutya, 29, Celso Linao, 29, ug Jolito Linao, 28, mga lumolupyo sa Zone II, Barangay Buaya sa mao gihapong dakbayan sa gihimong buy-bust operation nila ni Inspector Mercedario Balaba.
Target sa grupo si Mutya ug nakuhaan kini og tulo ka paketeng shabu. Samtang nadakpan sila si Jolito ug Celso nga ilang gidudahang nagsuyop sa lugar human nakuhaan og drug paraphernalia. - /EIM) (BANAT NEWS)