CEBU, Philippines - Laing traffic enforcer sa Cebu City Traffic Operations Management (CITOM) ang gipadam-agan na usab unta sa drayber nga dili gusto nga magpadakop bisan og nakahimo’g kalapasan sa trapiko.
Si Traffic Enforcer Bonifacio Dela Cruz nadistino sa eskena Gorordo ug General Maxilom Avenue nakalikay hinuon diha nga ang nagmaneho sa motorsiklo mipadasmag na unta kaniya kaniadtong Biyernes sa hapon.
Ang gidakop sa mga miresponde nga sakop sa CITOM mao si Ronald Batiancila, 28, taga Barangay Zapatera kinsa maoy nagmaneho sa motorsiklo. Giapil pagdakop ang angkas ni Batiancila nga si Felimon Monteros, 25, taga Barangay Guadalupe.
Si Joy Tumulak, operations chief sa CITOM, misaysay nga mga alas kuwatro kaniadto’ng Biyernes stop ang traffic light sa General Maxilom Avenue para sa mga sakyanan gikan sa Caretta paingon sa direksyon sa Fuente Osmeña.
Apan si Batiancila mipaturatoy gihapon pagpadagan sa motorsiklo bisan og stop ang signal ug hinungdan nga diriyot siya madam-agi sa mga sakyanan nga gikan sa General Maxilom Avenue ug mo-left turn paingon sa Gorordo Avenue.
Ang traffic enforcer dali nga mimando nga pahunongon unta si Batiancila apan wala motahod ug buot niya padam-agan si Dela Cruz. Si Dela Cruz nakabantay nga padam-agan siya sa motor mao nga iyang gipanlimbasogan nga dili siya mabutang sa apiki nga sitwasyon.
Si Batiancila ug Monteros nadakpan kay abtik kaayo nga nakaresponde ang CITOM car 501. Apan diha nga ang mga dinakpan nagluwan na sa patrol car, miambak kini pag-abot sa vicinity sa dalan Ramos.
Matud ni Tumulak nga nahitabo ang ginukdanay ug nadakpan ra gihapon ang duha nga misuway pag-ikyas. Namatud-an nga si Batiancila nga maoy collection manager sa baligyaanan og motor ug ang iyang kauban collection agent.
Dihang gisumiter og liquor test si Batiancila, positibo siya nga nakainom og ilimnong makahubog mao nga matud ni Tumulak mag-atubang ang dinakpan og dako’ng multa base sa bag-ong balaod. (BANAT NEWS)