CEBU, Philippines - Gipasakaan na og kasong kriminal ang drayber sa 10-wheeler truck sa piskalya human makaligis patay sa usa ka magtutudlo ug pag-umangkon niini sa barangay Balisong, Argao.
Si Insp. Alejandro Batobalonos, hepe sa Argao Police Station, nga nahinabi sa Banat News nagkanayon nga niadtong Biyernes ilang napasakaan og kasong reckless imprudence resulting in double homicide si Felixberto Ruba, 46, nga taga Tingub, dakbayan sa Mandaue.
Matud ni Batobalonos nga atol sa inquest proceeding ni Piskal Jerome Abarca, ang sinumbong nipili nga dili moduso og counter-affidavit ug adto na lang sa korte tubagon ni Ruba ang pasangil.
Samtang nagmaneho sa 10-wheeler truck, nadasmagan ni Ruba si Fermin Sardual, 28, kinsa nagmaneho sa motorsiklo kauban sa pag-umangkon nga 11-anyos niadtong Miyerkules sa gabii samtang paingon mopalit og pan sa bakery. Matud pa nga ang mga biktima naguyod sa lima ngadto sa 10 ka metros dayon naligsan.
Si Ruba nisuway sa pag-ikyas apan nadakpan sa barangay Banhigan, Dalaguete.
Si Ruba padulong maghatud og assorted goods ngadto sa Dumaguete City, Negros Oriental.
Gihimakak ni Ruba nga hubog ug nisuway siya pagsibat niadtong higayuna apan iyang giangkon nga naka-inom siya og gamay. (BANAT NEWS)