CEBU, Philippines - Laing dako’ng usbaw sa presyo sa produkto’ng petrolyo ang gipatuman na usab sa kompaniya sa lana dinhi sa Sugbo ug sa Visayas sugod kagahapon sa buntag.
Ang mga oil companies nipahibawo nga P1.30 ang gipatuman nga usbaw sa presyo sa gasolina, P1.25 sa krudo ug P1.45 ang usbaw sa presyo sa kerosene matag litro.
Tungod niini nagbagulbol na usab ang mga motorista sa kakalit ug kadako sa usbaw sa presyo sa petroleum products karon ilabi na nga ika-duha na kini ka higayon nga nagpasaka ang mga oil companies sa presyo sa ilang produkto sulod lang niining bulan sa Hunyo. Una na nga gipatuman ang increase sa petroleum products niadtong Hunyo 10 ning tuiga. Apan gipasabot sa mga higante’ng kompaniya sa lana nga ang nagkalapad nga kagubot didto sa Iraq, usa sa mga dako’ng supplier og lana sa kalibutan, maoy dako’ng hinungdan sa kataas sa pagsulbong sa presyo sa petrolyo sa nasud. (BANAT NEWS)