CEBU, Philippines - Ang hukmanan mimando nga dakpon ang 45 ka drayber og mga pribado nga sakyanan ingon man mga passenger jeepney tungod kay gibaliwala ra nila ang giisyo kanila nga traffic citation ticket sa mga traffic enforcers.
Si Joy Tumulak, operations officer sa City Traffic Operations Management, mitug-an nga nakadawat sila og kopya sa warrant of arrest sa mao nga mga drayber nga giisyo ni Judge Monalila Tecson.
Tungod niini, ang CITOM mimugna pagbalik og grupo nga langkoban sa mga traffic enforcers ug polis gikan sa PNP Traffic Group nga tahasan pagpangita niini’ng mao nga mga drayber.
Matud ni Tumulak nga daghan sa mao nga mga drayber nadakpan sa makadaghan nga higayon kay ang ila’ng multahan miabot man og kapin sa P100 mil.
Apan adunay naapil nga drayber og pribado’ng sakyanan nga nalutsan og warrant nga kausa ra g’yud madakpi tungod sa wala pagtuman sa traffic sign nga “No Left Turn.â€
Si Tumulak miingon nga imbes P500 ra ang iyang bayranan karon modako na kay wala man niya atimanan dayon diha nga ang kaso wala pa mapasaka didto sa korte.
Ang 22-anyos nga drayber nga nagtungha karon sa usa ka unibersidad sa dakbayan giadto na kagahapon sa CITOM team sa iyang gipuy-an aron dakpon apan swerte nga wala didto.
Giawhag ni Tumulak kadtong mga naisyohan og traffic citation ticket nga wala lang magtagad sa ilang multahan nga moadto sa ilang opisina. Samtang si Tumulak nakigtambayayong na sa LTO aron ang mga drayber nga masakmitan og lisensya dili iuli kanila kun dili nila bayaran ang multahan sa CITOM. (BANAT NEWS)