CEBU, Philippines - Gipahibawo sa kadagkoan sa Department of Environment and Natural Resources (DENR) 7 nga makig-alayon sila sa Land Transportation Office aron makapahigayon sila og subsob nga smoke emission test sa mga sakyanan nga nagbuga og itom kaayo nga aso.
Si DENR-7 Regional Executive Director Isabelo Montejo miingon nga ang mga sakop sa Environmental Management Bureau (EMB) maoy gitugyanan niya sa pakigtambayayong sa LTO. Himuon nila kini kay ang Hunyo gideklarar man nga Environment Month.
Matud pa ni Montejo nga ang mga sakop sa EMB-7 mouban sa LTO pagpahigayon og roadside random emission testing mata’g semana diha sa kadalanan nga sagad agian sa daghang mga pribado ug publiko’ng sakyanan.
Tumong sa DENR nga mapalambo g’yud ang kampanya batok sa mga sakyanan nga nagbuga og itom kaayo nga aso nga kalapasan sa mga lagda sa Clean Air Act.
Nabantayan nga bisan ang mga sakyanan nga bag-ohay pa nga gi-smoke emission test apan pabilin kini nga nagbuga og itom kaayo nga aso samtang nagdagan diha sa karsada.
Daghan ang nagduda nga bayad ra ang giapas sa mga tag-iya og smoke emission testing centers kay bisan og ang sakyanan nagbuga og itom kaayo nga aso ila gihapon nga papasahon.
Sa usa ka smoke emission testing center didto sa Talisay, nasaksihan sa Banat Manobela nga ang usa ka sakyanan mibuga og hilabihan ka itom nga aso, apan sa gihapon pasar sa test ang sakyanan.
Ang Banat Manobela adunay hulagway ug plate number sa mao nga sakyanan nahukman nga itago lang usa gawas kun ang kadagkoan sa DENR ug LTO mohimo og pakisusi.
Gawas sa roadside smoke emission test, gitug-an usab ni Montejo nga ang ilang buhatan mopahigayon usab og pagpanglimpyo sa coastal areas ug ingon man ang kasapaan.
Gani ilang ipahigayon sa Hunyo 22 ang 2nd Cebu Run for the rivers aron matabangan ang pag-rehabilitate sa pipila ka mga sapa.
Kauban sa maong kalihukan sa DENR-7 mao ang mga sakop sa Cebu Chamber of Commerce and Industry (CCCI).
Unya sa Hunyo 25, pagahimuon sa DENR-7 ug sa tanang mga sanga’ng buhatan niini ang region-wide simultaneous tree planting activity agi og pag-highlights sa Arbor Day Celebration sa maong adlaw.
Matud ni Montejo nga ang ilang tumong mao ang pagkuha sa atensyon sa publiko aron sila makigtambayayong sa kagamhanan paghimo’g kampanya pagpalambo sa kalikopan. (BANAT NEWS)