CEBU, Philippines - Tulo ang patay sa managlahing aksidente sa kadalanan sa Dalaguete, Moalboal ug San Francisco niadtong adlaw nga Lunes.
Giila ang mga biktima nga sila si Jurev Tebes, 22, taga Tumonoy, Moalboal Cebu nga maayong pagkapasok sa iyang motor sa multicab van sa Barangay Tunga, Moalboal ug Teodulea Acosto, 63, taga Tuba, Dalaguete Cebu, nga nabanggaan og traysikol sa Barangay Panukdukan, Dalaguete.
Laing nadasmagan ug namatay mao ang 80-anyos nga si Dionesia Bancale, 80, taga Sitio Danawan, Barangay Consuelo sa lungsod sa San Francisco nga nasampak sa usa ka motor. Base sa imbestigasyon sa Moalboal police, si Tebes sakay sa iyang motorsiklo nga paingon unta sa Poblacion dihang misuway kini og overtake sa nag-una nga awto nasugatan niini sa pikas lane ang multicab nga gimaneho ni George Palermo ug maayong pagkapaslak sa biktima sa ilawom niini hinungdan sa iyang kamatayon. Nasuta nga wala kini magsuot og helmet.
Samtang sa Dalaguete, patay sab ang 63- anyos nga si Teudulea Acosto kini nadasmagan og traysikol atol sa pagtabok niini sa kalsada sa Barangay Panukdukan. Ang drayber nga si Victor Clavera nga nakabangga kaniya mitahan sa kapolisan.
Laing lola usab ang namatay nga si Bangcali dihang nadasmagan kini og motorsiklo atol sa pagtabok niini sa dalan sa Sitio Danawan, Barangay Consuelo sa lungsod sa San Francisco.
Ang drayber sa motorsiklong nakadasmag kaniya nga si Geno Bano, 20, taga Sitio Palanas, Barangay Himensulan sa samang lungsod mitahan sa kapolisan. (BANAT NEWS)