CEBU, Philippines - Giawhag sa nagpakabanang Mandauehanon ang Ombudsman-Visayas nga mohimo sila og lifestyle check sa mga kawani sa Land Transportation Office (LTO) 7 nga nadistino sa extention office niini sa dakbayan sa Mandaue.
Si Dr. Danilo Dionson nga usa ka accredited physician sa LTO mihimo sa awhag tungod usab sa mitumaw nga mga katahap nga ang pipila ka mga kawani sa LTO naghimo og tago-tago nga kalihokan aron makakuwarta.
Matud pa nga adunay mga kawani sa LTO nga nakigkunsabo sa mga fixer nga naglihok sa mga buhatan sa LTO. Ang mga fixer gidili g’yud sa pagsulod sa mga buhatan sa LTO.
Si Dennis Bustillos nga maoy licensing chief sa LTO extention office sa Mandaue miingon nga dako na ang bayranan sa mga tawo nga modangop sa fixer kay mopatong man ang mao’ng tawo bugti sa iyang serbisyo.
Matud ni Dr. Dionson nga ang mga fixer nga adunay contact nga kawani sa sulod sa LTO maoy mosugat sa mga tawo nga buot magparehestro o mopabag-o sa rehestro sa ilang sakyanan.
Kun makumbinsir ang tawo nga mohatag sa iyang pagsalig ngadto sa fixer nga motabang pagpalihok sa iyang dokumento apan mangayo kini og dugang kuwarta nga isuborno sa LTO. Si Dr. Dionson mipadangat na og reklamo sa LTO Central Office apan wala gayud kini kahatagi og pagtagad.
Apil sa reklamo ni Dionson mao ang wala pagpataud og telepono sa LTO extention office sa Mandaue ug hinungdan nga ang mga tawo nga adunay tuyo sa LTO nga madala lang unta sa pagtawag sa telepono, mahasol g’yud pag-adto. (BANAT NEWS)