CEBU, Philippines - Usa ka 33-anyos nga lalaki ang patay human natusak-tusak sa bala dihang gipusil sa wala mailhing tawo sayo sa kaadlawon kagahapon sa Manlayag Patag, dakbayan sa Danao.
Ang biktima nga si Roderick Batulan, nga taga Barangay Cabungahan, Danao City nakaangkon og samad pinusilan sa iyang dughan ug ulo nga maoy hinungdan sa kamatayon niini.
Sa imbestigasyon ni PO3 Roselo Campo Jr., usa ka Henry Laguna nga padung sa Lapu-Lapu City maoy nakakaplag sa biktima nga nagbuy-od sa dalan tupad sa motorsiklo niini.
Nakuha sa kapulisan ang usa ka .38 revolver nga adunay upat ka bala ug cellphone nga anaa na karon sa kustodiya sa kapulisan. Ang kapulisan padayun na karon nga mihimo og imbestigasyon sa maong insidente. (BANAT NEWS)