CEBU, Philippines - Duha ka tinun-ang babaye ang gitulis niadtong Lunes, alas 2:45 sa kadlawon, sa may Natalio Bacalso Ave., dakbayan sa Sugbo.
Ang mga biktima giila nga sila si Divina James Coguita, 21, taga Basak-San Nicholas ug Gwendolyn Morales, 22, taga Quiot, dakbayan sa Sugbo.
Asoy sa mga biktima nga samtang sila naglakaw sa dalan, gihunongan sila og motorsiklo nga may sakay nga duha ka wala mailhing tawo.
Nikanaug ang backrider dayun tion og pusil ngadto sa mga biktima ug mideklarar nga tulis.
Nakuhaan si Coguita sa iyang Lenovo touchscreen cellphone nga nagkantidad og P3,999, usa ka microphone touchscreen cellphone balor og P3,500, school ID ug P26 nga kwarta samtang si Morales nakuhaan og shoulder bag nga may sulod nga school ID, company ID ug personal nga mga gamit. Ang mga tulisan dali nga nakasibat samtang ang kapolisan nihimo pa og follow-up operation sa maong insidente. (BANAT NEWS)