CEBU, Philippines - Panag-ilog sa duha ka babaye sa usa ka lalaki misantop sa pagpanung-gab sa lalaking ilang giilogan diha sa Sitio Carajay, Barangay Gun-ob dakbayan sa Lapu-Lapu kagahapon sa kaadlawon.
Ang biktima mao si Gino Gibao Garo, 19, residente sa maong dapit samtang ang suspek mao si Maribel Gasalao Pladjero, 18, residente sa Ibabao, lungsod sa Cordova.
Sa pasiunang imbesti-gasyon ni PO3 Lydo Pinos nasayran nga mga alas 2:10 kagahapon sa kaadlawon misulong si Pladjero sa gipuy-an ni Garo aron makighusay sa bag-ong kapuyo niining babaye.
Atol sa ilang panaglalis wala makabantay si Garo nga miibot og kutsilyo si Plajero dayong hansak sa tiyan ni Garo hinungdan sa pagdala niini ngadto sa tambalanan apan gumikan sa kritikal nga kondisyon gibalhin kini sa VSMMC.
Samtang si Pladjero dali usab nga nasikop ni Roque dela Serna usa ka tanod ug gidala sa buhatan sa kapolisan. (BANAT NEWS)