CEBU, Philippines - Si Mayor Michael Rama miawhag sa iyang mga sakop nga susihon kun ang dapit likod nga bahin sa kanhi Bureau of Customs building nga karon gitawag na og Malacañang sa Sugbo maayo ba nga himoon nga public beach.
Ang mao nga dapit gihugopan sa daghang mga tawo atol sa pagsaulog sa Domingo sa Pagkabanhaw ug nakadani pag-ayo ni Mayor Rama tungod sa kaanindot sud-ongon.
Ang gikabalak-an ni Rama kun adunay lawom nga bahin sa dagat nga makahatag og peligro sa mga maligo nga dili maantigo molangoy.
Ipasusi usab sa mayor kun dili ba kusog ang sulog sa tubig diha sa mao nga dapit. Daghan kaayo ang nalingaw sa pagkaligo sa mao nga dapit kaniadtong Domingo. Ang uban hinoon mapanagan-on nga maligo diha sa mao nga dagat kay duol kini sa Sitio Bato, Barangay Ermita nga anha moagas ang hugaw gikan sa Carbon Market. (BANAT NEWS)