CEBU, Philippines - Napahak ang ulo sa usa ka boatman human kini maligsi sa usa ka jetski sa kadagatan sa Maribago dakbayan sa Lapu-Lapu sa milabay’ng hapon.
Ang biktima mao si William Misa Aying, 33, taga Talima isla sa Olango boatman sa Tharseas Seacraft.
Ang nakaligis mao si George Ruiz Cruda, 43, residente sa sitio Looc Brgy. Maribago dakbayan sa Lapu-Lapu mekaniko og jetski sa PSI Leeports Inc.
Sa pasiunang imbestigasyon ni PO1 Jomar Florentino sa Homicide Section nasayran mga alas 4:00 sa milabay’ng hapon, gi-test drive ni Cruda ang iyang gi-repair nga jetski.
Apan sa pagpadagan niini, kalit milagapak ang ilawom nga bahin sa jetski ug pagsusi pa niini usa ka tawo ang iyang naligsan.
Matud pa ni Aying gikan usab siya sa ilawom sa iyang pump boat kay dili maibot ang angkla hinungdan nga iya kining gisalom ug sa pagsaka niya wala kini makabantay nga dunay jetski sa iyang tungod.
Si Aying nahiagum og samad sa iyang ulo ug gidali kini og dala sa Mactan Doctors hospital ug luwas na kini sa makuyaw nga kahimtang.
Samtang si Cruda pormal nga mitahan sa kapolisan ug andam kining manubag sa iyang obligasyon inabagan sa tag-iya sa jetski. (BANAT NEWS)