CEBU, Philippines - Ang Department of Health nanawagan sa publiko nga mag-amping sa panglawas karon nga grabe na kaayo ang kainit sa panahon tungod kay posibleng masakit sila og kanser sa panit ug uban pa.
Pahimangno karon sa DOH-7 sa publiko nga likayan ang magpainit gikan sa alas diyes sa buntag hangtod na sa alas dos sa hapon.
Matud pa ni Dr. Joanri Riveral, medical specialist sa DOH-7 nga gawas nga maka-itom, maka-cancer kini sa panit.
Sa mga mangaligo sa dagat angay nga siguraduhong mogamit og sunblock alang sa proteksyon sa panit.
Apan mipahimangno si Riveral nga ang sunblock kinahanglang kadtong duna lamang 30% skin protection formula tungod kay mao kini ang tukma sa atong mga panit.
Nasayran nga sagad sa mga sakit nga motumaw panahon sa summer mao ang ubo, sip-on, hilanat, kalibanga, piskat, animal bites, skin diseases ug heat stroke.
Aron dili mainitan og maayo, tambag sa DOH nga dili magsul-ob og mga dark colors ug makatabang usab ang pagkaon og mga prutas nga makatambal sa atong kauhaw. (BANAT NEWS)