CEBU, Philippines - Patay ang usa ka sakop sa Bureau of Jail Management and Penology (BJMP) human kini nilikay sa nilabang nga iro samtang nagmaneho sa iyang motor diha sa barangay Malingin, Daanbantayan pasado alas-8 sa gabii niadtong miaging Lunes.
Ang namatay giila nga si Al Ereckson Cadiente, 26, nadestino sa Bogo City Jail taga barangay Agujo, Daanbantayan. Ang biktima wa magsuot og helmet atol sa pagkahitabo.
Sa imbestigasyon sa kapolisan, si Cadiente nagmaneho sa iyang motor gikan sa siyudad sa Bogo paingon ngadto sa Daanbantayan.
Pag-abot sa barangay Malingin, kalit nga milabang ang usa ka iro ug gilikayan unta kini ni Cadiente apan nawad-an siya og kontrol sa motor ug maayong pagkasaliring ug naparok ang iyang ulo sa sementado nga dalan.
Daling gidala si Cadiente sa Daanbantayan District Hospital apan pipila ka minutos ang milabay namatay kini tungod sa cerebral hemorrhage. Ang pagsuot og standard motorcycle helmet ning bag-ohay lang gihingusgan pinasikad sa Motorcycle Helmet Act of 2009 o Republic Act 10054 nga nagmando sa tanang motorista pagsuot niini aron kamenusan ang grabeng kadaot nga mahiaguman sa ulo kun mahitabo nga sila madisgrasya. (BANAT NEWS)