CEBU, Philippines - Mga opisyal ug kawani sa Barangay Pooc, Talisay ipaubos og drug test pipila ka adlaw gikan karon sa tumong nga mahibaw-an kinsa kanila ang adik sa ginadiling drugas.
Giaprobahan sa konseho sa Talisay ang resolusyon ni Konsehal Doroteo Emit nga naghangyo ni Mayor Johnny De los Reyes nga mogahin og P30 mil alang sa maong katuyoan.
Matud ni Emit nga base sa intelligence report giingong kuyanap ang paggamit og ginadili nga drugas ug uban pang substance diha sa kabarangayan sa Talisay ug ang barangay Pooc giingong paboritong lubloban sa mga drug pusher ug user.
Si Emit kinsa taga Barangay Pooc mibutyag nga dunay community organizations ang mipadayag sa ilang kabalaka ug pakabana kabahin sa report nga nagkadaghan ang mga teenager, low ug middle class workers, ginikanan ug bisan mga professional ang giingong nagumon sa paggamit og ginadiling drugas. (BANAT NEWS)