CEBU, Philippines - Kritikal ang usa ka maguwang nga lalaki human siya gidunggab sa iyang manghod diha sa sitio Tabok, barangay Maslog, dakbayan sa Danao alas-6 pasado ang takna niadtong Huwebes sa gabii.
Giila ni SPO4 Arestio Espina sa kapolisan sa maong dakbayan ang naangol nga mao si Jovanie Gala, 37, samtang ang nagdunggab mao ang manghod niini nga si Ronilo Gala, 30, kinsa daling nakasibat human sa hitabo.
Si Espina miingon nga nag-inom ang managsuon nianang tungora ug nautingkay ang karaan nilang kasungian dihang nangahubog hinungdan sa ilang panaglalis ug misangpot sa pagpanunggab.
Ang biktima nga nakaangkon og duha ka samad dinunggaban sa tuong dughan daling gidala sa tambalanan samtang gipangita pa ang suspek.
Sa laing bahin, naangol ang usa ka 71-anyos nga apohan human gipugakhang sa iyang apo sa miaging hapon diha sa sitio Bangko-bangko, barangay Sandayong sa lungsod sa Tuburan.
Nalandig sa tambalanan ang mangulingay nga si Joseph But-oy, 71, human gipusil sa apo nga si Marlon Bot-oy. Si PO1 Joseph Bejer, desk officer, nga nahinabi sa Banat News miingon dugay nang nagdumot ang suspetsado sa iyang apohan ug niadtong tungora nagkabingkil ang duha hinungdan nga napusilan kini og pugakhang sa siko ug milusot ang bala sa iyang tiyan. Gidala sa Tuburan District Hospital ang biktima samtang nakaikyas ang suspek. (/EIM)(BANAT NEWS)