CEBU, Philippines - Usa ka negosyante gikawatan og Iphone sa usa ka wala mailhing babaye kinsa giingong nagpakaaron-ingnong kostumer ug misulod sa iyang tindahan sa dalan M. C. Briones, barangay Guizo, Mandaue kaniadtong Martes sa gabii. Ang biktima mao si Maria Paz Jimenez, 26-anyos, taga Goldsmith Subdivision, Barangay Paknaan miingon nga kantidad og P40 mil ang Iphone nga nakawat.
Si PO1 Jerome Lendio sa Presinto 1 sa Mandaue City Police Office (MCPO) miingon nga na-busy ang biktima sa pag-atiman sa mga kostumer ug wala na makabantay nga gipunit na diay sa wala mailhing babaye ang butang gikan sa lamesa.
Didto sa Barangay Poblacion, Danao si Reynante Aguilar, 45-anyos, nagpuyo sa maong dapit gikawatan usab og Iphone nga nagkantidad og P40 mil ug Nokia cellphone nga nagkantidad ug P5 mil.
Si PO1 Joseph Aledon sa Danao City Police Station miingon nga nahinanok sa pagkatulog ang biktima ug mga kauban sulod sa ilang balay hinungdang wala nakamatikod nga gilungkab ang pultahan ug sa pagsulod sa kawatan sa balay. (BANAT NEWS)