CEBU, Philippines - Gironda kagahapon sa hapon sa mga sakop sa Criminal Investigation and Detection Group 7 ug San Fernando police ang balay nga giabangan sa magtiayon nga Benito ug Wilma Tiamzon sa Sitio Bulok-bulok, Barangay Sangat, San Fernando.
Armado og search warrant nga giisyu ni Regional Trial Court Judge Soliver Peras sa Branch 10 gironda sa CIDG-7 pinangulohan ni Senior Supt. Ritchie Posadas ang maong balay aron pagpangita pa og dugang mga ebidensya batok sa magtiayong gitumbok nga lider sa Communist Party of the Philippines – New People’s Army.
Diha sa pag-serve sa search warrant ang kapitan sa barangay Sangat nga si Ranulfo Sasuman. Si Posadas nga nahinabi sa Balitang Bisdak atol sa pag-serve sa warrant miingon nga mga armas ang ilang gipangita base sa search warrant. Alas-6 na sa gabii nahuman ang pagsusi sa balay nga gipanag-iya ni Johnny Sevillano nga gikatahong giabangan sa mga Tiamzon apan walay nakit-an ang CIDG nga armas.
Ipatawag unya sa CIDG7 ang tag-iya sa balay aron pangutan-on kabahin sa magtiayon nga nangabang kanila.
Ang hepe sa Police Regioal Office 7 Chief Supt. Danilo Constantino miingon nga sa pagkakaron wala pa silay nahibaw-an nga laing safehouse sa mga Tiamzon gawas sa San Fernando. Ug matud pa niini nga kasamtangang gihimoan nila og background investigation ang lima ka kauban sa magtiayong Tiamzon dihang nasikop ang grupo sa Military Intelligence Group ug Intelligence Service of the Armed Forces of the Philippines uban sa kapolisan.
Miingon si Constantino nga dunay basehan ang pagkasikop sa duha sukwahi sa pamahayag sa mga militanteng grupo.
Gitun-an karon sa PRO-7 kung angay bang mopadala og dugang pwersa ang kapolisan sa mid-northern Cebu nga kaniadto maoy dunay daghang naglihok nga NPA.
Samtang gihimakak sa AFP ang pangangkon sa kampo sa mga Tiamzon nga mga iring ug iro ra ang ilang gidala atol sa ilang pagkasikop kanila ug dili mga armas ug granada.
Matud pa ni AFP spokesman Lt. Col. Ramon Zagala dunay mga unregistered firearms, upat ka laptops, 16 ka mobile phones ug 20 ka flash drives ang nasakmit gikan sa magtiayon ug lima nila ka mga sakop atol sa pagdakop kanila niadtong Marso 22 sa Aloguinsan, Cebu.
Gihimakak ni Zagala ang pasangil ni Atty. Rachel Pastores kabahin sa maong mga binuhing house pets. Gipasangil nila nga planted lang ang mga ebidensyang nakuha gikan kanila.
Ang magtiayong Tiamzon nag-atubang og kinse ka kasong murder ug karon nadugangan og kasong illegal possession of firearms. Ang mga abogado sa duha mi-walkout atol sa inquest proceedings sud sa Philippine National Police headquarters sa Camp Crame kay gihulagway nilang illegal ang maong proceedings kay di sa prosecutor’s office gihimo, gusto nila nga didto kini himoon sa Leyte diin giisyu ang warrant of arrest.
"Hindi kami magpa-participate sapagkat highly irregular 'yun, walang jurisdiction 'yung mga state prosecutor na mag-inquest sa Manila," matud ni Pastores. (Bryner L. Diaz , Grace Lacamiento ug report gikan sa Philstar.com/EIM) (BANAT NEWS)