CEBU, Philippines - Gwardya nga giingong miangkon nga nangawat sa gibantayan niya’ng supermarket sa dakbayan sa Mandaue nadakpan dihang paingon na unta siya nga molayas paingon sa Negros Oriental.
Si Romulo Jurado, lumad nga taga Guihulngan, Negros Oriental gidakop ni SPO3 Procolo Ando samtang luwan kini sa Ceres Bus didto sa Boljoon.
Ang polis paingon na unta nga mo-duty sa Boljoon Police Station ug gikasakay niya si Jurado.
Ang suspek giduol sa polis kay natahap kini sa iyang linihokan nga giingong klaro kaayo nga sabog pa sa illegal nga drugas.
Misamot ang katahap sa polis dihang nakita niya nga ang suspek nagdala og plastik bag nga klaro kaayo nga daghang kwarta sa sulod.
Ang hepe sa Boljoon Police Station nga si Inspector Dexter Basirgo mibutyag nga mitawag si SPO3 Ando ug nagpahibalo mao nga dali sila nga mihimo’g checkpoint operation ug gisikop nila si Jurado.
Sa imbestigasyon, giangkon ni Jurado nga gwardya siya sa Bideda Security Agency ug kaniadtong Domingo gituyo niya nga nagpasirado siya sulod sa tindahan kauban ang usa ka “Iño†ug mikawat sa daghang kwarta sa tindahan.
Ang dinakpan itugyan ngadto sa kapolisan sa Mandaue aron sila na ang mopasaka og kaso. (/RUB)(BANAT NEWS)