CEBU, Philippines - Gawas nga social media ug texting capital, laing angga na usab ang nakuha sa Pilipinas kay mao na kini ang "selfie capital of the world."
Ang sinuwat ni Chris Wilson nga napatik sa Time Magazine nga makita usab sa website sa maong internasyonal nga mantalaan (http://www.time.com/) naghisgot nga ang Pilipinas ang dunay labing daghang "selfie" nga na-post sa internet pinaagi sa Instagram.
Ang maong pagtuon gihimo sa 402,197 ka mga selfies kon hulagway nga nagpakita sa close-up shot sa nawong sa usa ka tawo nga gi-post sa photo ug video sharing sites gikan sa Enero 28 ngadto sa Pebrero 2 ingon man Marso 3 ngadto sa 7 ning tuiga.
Ang dakbayan sa Makati ug Pasig maoy pulos nag-una sa lista diin dunay 258 ka mga nag-selfie sa 100,000 ka mga tawo.
Wala usab magpauwahi ang dakbayan sa Sugbo kinsa nakakuha sa ikasiyam nga pwesto diin dunay 99 selfie-takers per 100,000 people.
Gawas niining tulo, laing mga syudad sa Pilipinas usab ang naapil sa maong listahan sama sa Baguio City nga anaa sa ika-16 nga pwesto (82 selfie-takers per 100,000 people), Quezon City sa ika-59 nga pwesto (44 selfie-takers per 100,000 people), ug Iloilo City sa ika-72 nga pwesto (36 selfie-takers per 100,000 people).
Ania ang ubang naapil sa top 10 "selfiest cities in the world:" Manhattan in New York (2), Miami in Florida (3), Anaheim and Santa Ana California (4), Petaling Jaya in Malaysia (5), Tel Aviv in Israel (6), Manchester in England (7), Milan in Italy (8), and George Town in Malaysia (10). (BANAT NEWS)