CEBU, Philippines - Nasikop sa mga sakop sa National Bureau of Investigation ang siyam ka tawo sa raid nga gipahigayon niini sa dakbayan sa Talisay kagahapong adlawa sa Coles Street sa Tabunok, dakbayan sa Talisay.
Subject sa raid sa NBI sila si Jason Narido ug Nilo Abendan, apan nasikop sab sila si Romy Montalbo, Welbert Lopez, Mariano Risona, Dirk Lester Inoc, Marian Bas, Rolando Racasa ug Philip Christian Loyloy tungod kay naatlan kini sa lugar atol sa raid.
Nakuhaan si Abendan og usa ka bulto nga shabu, 110 ka gagmay nga putos sa shabu, ug usa ka .45 kalibre nga armas nga may pito ka bala ug P11 mil nga salapi nga gituohang halin niini sa pagpamaligya og shabu.
Nakuhaan sab si Narido og 60 ka gagmay nga pakete nga shabu ug kagamitan sa pagsuyop niini ug duha ka cellphones.
Base sa report sa Balitang Bisdak nga usa na ka buwan nga gi-surveillance ang duha. Si NBI 7 Director Antonio Pagatpat miingon nga notadong pushers ang duha. (Bryner L. Diaz/EIM)
Pundo alang sa rehab sa Northern Cebu andam na
Gibutyag ni Rehabilitation Czar Panfilo Lacson nga andam na ang pundo alang sa rehabilitasyon sa mga government buildings sa Kabisay-an apil na ang Sugbo, nga naguba sa linog ug bagyong Yolanda.
Matud ni Lacson nga posible pipila ka semana sugod karon, masugdan na ang rehabilitation plan sa mga naapektuhan sa kalamidad.
Dugang ni Lacson nga miduso na siya og memorandum ngadto ni Presidente Benigno “Noynoy†Aquino III aron sa paghatag na sa gikinahanglang mga pundo ngadto sa mga hingtungdang probinsya ug mga lungsod.
Si Bise Gobernador Agnes Magpale miingon nga naduso na ngadto sa buhatan ni Lacson ang rehabilitation plan sa Sugbo.
Sa giduso nga rehab plan sa Regional Disaster Council-7, mokabat og P26 bilyones ang gikinahanglan alang sa rehabilitasyon sa amihanang Sugbo ug P800 milyones niini ang gikinahanglan alang sa pagpaayo sa public buildings.
Wa pa hinuon mahisguti ni Lacson kun kanus-a g’yud ang paghatag sa pundo alang sa rehabilitasyon. (BANAT NEWS)