CEBU, Philippines - Gipaubos na sa heightened alert ang Central Visayas sugod pa niadtong Domingo tungod sa pagbisita ni Presidente Benigno Simeon Aquino III karong adlawa aron saulogon dinhi ang EDSA People Power Revolution.
Sumala pa sa Police Regional Office 7 Regional Director Chief Supt. Danilo Constantino hugtan nila ang seguridad ug andam na usab ang mga sakop sa Civil Disturbance Management personnel alang sa pagbungkag unya sa mga mag-rally nga walay permit.
Apan gibutyag ni Constantino nga wala silay nadawat nga impormasyon nga dunay motisok og kasamok sa maong kasaulogan.
Samtang ang hepe sa Police Community Relations sa dakbayan sa Sugbo Chief Insp. Enrique Belciña miingon nga 257 ka mga polis ang ipakatap ngadto sa kadalanan sa rota sa mga VIP (very important people).
Si Constantino maoy mangunay pagbantay sa seguridad sa pamuno nasud atol sa pagbisita niini sa Isla sa Bantayan samtang si Deputy Provincial Director for Operation nga si Supt. Renato Malazarte mao usab ang gitahasan sa seguridad sa pangulo sa pagtambong niini sa kalihokan sa hawanan sa Kapitolyo.
Ang Armed Forces of the Philippines-Central Command mipadala na og Task Group Cebu aron motabang sa Presidential Security Group (PSG), langkoban kini sa 2nd Air Division sa Philippine Air Force ug mga sakop sa Naval Forces Central.
Ang Centcom dunay giandam nga armored personnel carriers alang sa re-enactment sa EDSA Revolution. (/EIM)(BANAT NEWS)