CEBU, Philippines - Suspek sa pagpanigbas ug pagpamusil nadakpan sa Zone Gabi, barangay Paknaan, dakbayan sa Mandaue alas-7 pasado ang takna sa miaging gabii. Ang nadakpan mao si Ruther Garciano, 37, kinsa gipasanginlang mitigbas sa iyang silingan nga si Joven Entica , 74.
Si SPO2 Danilo Barrita sa kapolisan sa Presinto 3 sa Mandaue City Police Office (MCPO) miingon nga nasuko ang suspetsado sa anak sa biktima nga si Janeth Entica Beloria, 46, nga gipasanginlan sa suspek nga namutol sa mga tinanom nga kamoteng kahoy niini. Mipatunga unta ang biktima apan nasuko ang suspek ug gitigbas kini sa bukton maong midagan, apan gigukod kini sa suspek ug gipusil sa gidala usab niining armas.
Ang anak sa biktima nga si Janeth dali nga nakapangayo’g panabang nila ni PO1 Jerry Pobadora, PO2 Junie Gande sa kapolisan sa Presinto 3 kuyog sa mga barangay tanod nga daling midakop sa suspek.
Nakuha gikan kaniya ang usa ka kalibre 38 paltik nga rebolber nga may lima ka buhing bala apan wa na igkita ang sundang. (BANAT NEWS)