CEBU, Philippines - Patay ang 12- anyos nga batang lalaki human kini milayat sa dagat diha sa Gothong wharf sa Barangay Looc ,dakbayan sa Lapu-Lapu kaniadtong Biyernes sa hapon. Ang nalumos patay mao si Marlo Binabaya, nagpuyo sa sitio Carajay, Barangay Gun-ob sa maong siyudad.
Sa pasiunang imbestigasyon sa kapolisan nasuta nga alas- 3 sa milabay’ng hapon naligo sa dagat ang bata uban sa iyang mga ig-agaw.
Matud pa nga si Marlo gihagit kini sa iyang mga ig-agaw nga nag-edad og katorse ug onse nga molayat gikan sa pantalan bisan dili kini makamao nga molangoy, tungod kay gipasaligan nga saw-on kini sa mga ig-agaw.
Ang bata nga mitoo sa awhag nga siya paambakon mitibugsok sa ilawom sa tubig ug wala na maguniti sa iyang mga ig-agaw.
Tungod sa kahilit sa dapit, walay napangayoan og tabang ang mga bata hangtud nga mikawas na lang sila sa dagat ug gipaabot ang paglutaw ni Marlo, apan wa na kini panimuot sa paglutaw.
Dunay mga tawong mitabang paghaw-as sa lawas ug gidala sa tambalanan apan patay na ang bata.(/EIM)(BANAT NEWS)