CEBU, Philippines - Gipatangtang na ni Mayor Michael Rama ang mga sementado nga “road separators†taliwala sa General Maxilom Avenue aron molapad ang karsada nga kasayawan sa mga dance contingents nga mosalmot sa Sinulog Grand Parade ugma.
Sa milabay’ng mga Sinulog Grand Parade ang mao nga mga road separators nakahasol sa mga dancer tungod kay nakapagamay kini sa lugar nga ilang kasayawan mao nga maglukso-lukso ra ang mga dancer nga moagi sa mao nga dapit. Una nga gipatangtang ni Mayor Rama mao ang sementado nga road separator nga gitukod taliwala sa General Maxilom atubangan sa main entrance sa Caretta Cemetery.
Gisunod sa pagpatangtang sa mayor mao ang mga road separators nga nahimutang dapit sa eskena sa Gorordo ug General Maxilom Avenue. Gipatangtang usab ang mga road separator duol sa Iglesia Ni Cristo.
Matud ni Ricky Ballesteros, ang Executive Director sa Sinulog Foundation Incorporated, nga gipaninguha nila nga mapatangtang gayud ang tanang road separator sa General Maxilom Avenue.
Ang mayor miingon nga tukma lang ‘sab ang sugyot nga palapdan ang bahin sa karsada nga agian sa mga contingent pinaagi sa pagkuha sa sementado nga road separators atol sa Sinulog Grand Parade. Ang mao nga mga road separator ibalik ra usab sa CITOM human sa Sinulog. (/WC)(BANAT NEWS)