CEBU, Philippines - Mihatag og giya ang kapolisan sa publiko kun unsay buhaton niini kun may kusog nga aftershock o kagubot nga motumaw ugma.
Si Chief Insp. Enrique Belciña, hepe sa Police Community Relations sa Cebu City Police Office (CCPO) mihangyo sa publiko nga magpabilin nga kalma aron dili makamugna og kasamok.
Matud ni Belciña nga sa mga anaa sa grandstand gihangyo niini nga mo-relax lang ug dili mag-panic kun may kusog nga tay-og.
Midugang siya nga kinahanglan nga nasayod na ang magtatan-aw sa exit sa maong lugar. Dugang ni Belciña nga sa higayon nga adunay aftershock kinahanglan nga sundon sa mga tawo ang announcement sa kapolisan.
Mipahimangno usab si Belciña niadtong mga tawo nga magmugna og kasamok sa maong kalihokan nga ila gyud kining dakpon.
Sumala pa ni Belciña nga sa siyam ka sector sa carousel route adunay siyam usab ka mga Kaoshiong Bus nga gipakatap isip prisohan sa mga tawo nga magmugna og kasamok sa maong kasaulogan. (/WC)(BANAT NEWS)