PCOO mi-warning sa publiko

CEBU, Philippines - Mipasidaan ang kalihim sa Presidential Communications Operations Office (PCOO) sa publiko kalabot sa mga migamit sa ngalan sa maong  ahensya aron makapangayo og tabang alang sa mga giingong biktima sa  bagyong "Yolanda".

Sumala  sa Philippine  Information Agency (PIA) nga  ang  maong  pasidaan  gihimo ni PCOO Sec. Herminio “Sonny” Coloma, Jr. kinsa  mireklamo  bahin  sa paggamit sa  iyang ngalan sa  mga  wala  hiilhing mapahimuslanong  tawo.

Sumala sa PIA  nga  gibutyag  ni Coloma  nga  didto  niya kini  hisayri sa  mga tinugyanan  sa Management Association of the Philippines (MAP).

“Adunay mga nangilad nga nagpakaaron-ingnon nga tinugyanan sa PCOO nga giingong nangayo og donasyon alang sa mga biktima sa Bagyong Yolanda,” matud pa ni Coloma.

Midugang  ang  PIA  nga base sa mga impormasyong miabot kang Coloma, gisulayan sa mga mangingilad nga biktimahon ang MAP ug ang Financial Executives Institute of the Philippines (FEIP).

Hinuon  maayo  na lang kay wala  magpailad  ang  taga MAP ug  ang FEIP, sumala  pa  sa PIA.

Samtang sa laing bahin, miingon usab si Coloma nga gigamit usab niining mga “scammer”  ang iyang ngalan  dihang gitawagan ang usa niya ka higala ug gitanyagan kuno nga ikuha kini  og schedule aron makaduol  ug  makaestorya si Presidente Benigno S. Aquino III.

“Akong hugot nga gihimakak nga dili ako---ug dili nako himuon—ang maong pagtawag sa bisan kinsa man, ug ilabi na nga wala ako’y gihatagan sa pagtugot nga mag-representar sa paghimo niini,” pahayag pa ni Coloma.

      Tungod niini, gibutyag  sa PIA  nga magpagawas og tukmang pahayag ang kalihim sa PCOO sa mass media ug sa website sa opisina aron mapasidan-an ang tanan. (BANAT NEWS)