CEBU, Philippines - Hayan di na magamit pa sa kagamhanan sa lalawigan sa Sugbo ang Cebu International Convention Center (CICC) tungod sa paghagsa sa kisame ug pagkatagak sa ubang bahin sa sulod sa maong edipisyo dihang gitay-og kini sa 7.2 nga linog sa miaging semana.
Ang CICC gipatukod sa Kapitolyo sa yuta nga sakop na sa syudad sa Mandaue sa kantidad nga himabaw sa usa ka bilyon ka pesos.
Si Provincial Engr. Hector Jamora miingon nga luwas pa hinuong gamiton ang CICC human masusi sa structural engineer sa probinsiya sa Sugbo ang kinatibuk-ang edipisyo.
Apan gitumbok ni Jamora nga magkinahanglan og retrofitting o kaha upgrading ang maong edipisyo sa dili pa kini gamiton.
Sigun pa ni Jamora nga dili mominos sa P66 milyones ang gikinahanglan nga gahin aron mapaayo ang maong convention center.
Apan si Gov. Hilario Davide nagkanayon nga ang kagamhanan sa lalawigan sa Sugbo maglisod sa pagpaayo sa CICC tungod sa kadako sa gahin nga gikinahanglan.
Matud pa niya nga kulang kaayo ang koleksyon sa kagamhanan sa lalawigan sa Sugbo.
Gani giminusan og P1 bilyon ang annual budget sa Kapitolyo alang sa sunod tuig.
Gitataw hinuon sa gobernador nga tun-an sa iyang buhatan ang maong tinguha ug posibling mangutang na lang kini sa mga financial institution sa lalawigan aron makapaayo kini sa CICC. (/WC) (BANAT NEWS)