CEBU, Philippines - Ang buhatan sa city veterinarian sa Mandaue temporaryo nga gipahiluna sa Mandaue City Sports and Cultural Complex sa sitio Tribunal sa barangay Centro.
Ang pagbalhin sa ilang buhatan gihimo tungod sa mga kadaut sa bag-ong merkado publiko human sa kusog nga linog niadtong Oktubre 15.
Si Dr. Daisy Penetrante nga maoy city veterinarian sa maong dakbayan miingon nga bisan sa ilang pagbalhin og buhatan, sa gihapon wala kini makabalda sa nagpadayon nilang pagpamakuna sa mga hayop.
Dugang pa niya nga dili lamang ang tawo ang naapektohan sa maong linog kun dili lakip na usab ang mga binuhi nga hayop, sama sa iro nga nagkurog ug wala nay gana nga mokaon.
Si Penetrante miingon nga ang mga tag-iya og iro miadto sa ilang buhatan ug nangayo og tambag sa angay nilang buhaton aron maulian ang ilang hayop.
Matud pa niya nga iyang gihatagan sila og bitamina sa iro aron mahiuli ang normal nga panglihok-lihok niini. (BANAT NEWS)