CEBU, Philippines - Wala na kapasar sa panukdanan sa National Meat Inspection Commission (NMIC) ang modernong ihawan sa syudad sa Sugbo. Kini tungod sa kapakyas sa pagkuha sa Cebu City Modern Abattoir og double A rating atol sa gipahigayon nga inspection sa nga opisyal sa NMIC sa miaging adlaw.
Subay niini ang nahisgutang ihawan sa syudad sa Sugbo wala na kahatagi og accreditation sa NMIC nga makaihaw ug maka-supply og karne dinhi sa siyudad sa Sugbo ug ubang mga merkado sa lalawigan sa Sugbo.
Si Engr. Arcenio Uy, ang hepe sa maintenance Section sa Cebu City Modern Abattoir, nikonpirmar sa maong sitwasyon sa ihawan karon.
Gipahibawo ni Uy nga ang kagamhanan sa siyudad sa Sugbo nagkinahanglan nga mogasto og dakong kantidad aron mailisan og bag-ong mga kagamitan o mga ekipo ang maong ihawan sa syudad.
Gibanabana ni Uy nga ang bag-ong mga kagamitan ug ekipo sa maong ihawan nga gibana-bana nga mokabat og P10 ngadto sa P15 milyones .
Siya nagtuo nga si Mayor Mike Rama mohimo dayon og lakang aron mapadali ang maong proyekto alang sa mas paspas ug mas limpyo nga ihawan alang usab sa mas dako nga kita sa kagamhanan sa syudad sa Sugbo.
Nasayran nga gitinguha sa kagamhanan sa syudad sa Sugbo nga makuha sa modernong ihawan ang triple A nga rating sa NMIC aron maka-supply kini og karne dili lamang dinhi sa siyudad ug lalawigan sa Sugbo kun dili hangtud na sa ubang probinsiya sa Visayas ug ubang bahin sa nasud ug ingon man sa ubang kanasuran. (BANAT NEWS)